Taksa e sheshtë, paga e Berishës rritet me 3. 8 mijë USD

TIRANË- Pas vendosjes së taksës së sheshtë, një nga rrogëtarët e pakët që ka përfituar ka qenë kryeministri Berisha. Sipas llogarive, Berisha duhet t’i gëzohet taksës së re pasi ka përfituar nga vendosja e taksës së sheshtë 28.500 lekë në muaj. Përfitimi i kreut të qeverisë vjen pasi taksa e sheshtë sjell një barrë më të vogël për të gjithë ata që kanë një pagë mbi 1 mijë dollarë në muaj, krahasuar me tatimin progresiv mbi pagën që zbatohej deri në korrik të këtij viti. Tatimi progresiv mbi pagën që ishte në fuqi deri në 1 korrik 2007, parashikonte që ata që kishin paga të larta të paguanin më shumë, ndërsa mbronte pagat e vogla. Ndërsa e kundërta ndodh me taksën e sheshtë. Aktualisht Berisha merr të ardhura mujore nga paga dhe grada shkencore 220 mijë lekë, ose në lekë të vjetra 2.2 milionë lekë. Deri në 6 mujorin e parë të këtij viti, për këtë pagë Kryeministri paguante vetëm për tatimin mbi të ardhurat 50 500 lekë në muaj, ndërsa me vendosjen e tatimit mbi të ardhurat në nivelin 10%, pagesa ulet në 22 mijë lekë në muaj. Pra barra fiskale e kreut të qeverisë ulet me 28 500 të reja ose 280 500 lekë të vjetra në muaj.

Nëse e llogarisim për një vit, nga vendosja e taksës së sheshtë dhe nxjerrja jashtë ligjit të tatimit progresiv mbi të ardhurat, Berisha paguan më pak 342 mijë lekë të reja, ose rreth 3 800 dollarë (kursi i këmbimit i lek. = 0.9 USD). Por taksa e sheshtë ka lehtësuar nga barra fiskale vetëm rrogën e Kryeministrit, ndërsa rrogat e arsimtarëve, mjekëve, infermierëve, etj., janë rënduar. Për të gjithë kategoritë e pagave që nuk kalojnë 500 dollarë në muaj, barra fiskale rritet me 3 herë, ndërsa më shumë nga kjo taksë e re do paguajnë të gjithë ata që kanë një pagë deri në 1 milionë lekë të vjetra. Përfitojnë vetëm pagat që kalojnë 1 milionë në muaj, siç janë paga e Berishës që shkon në rreth 2.2 milionë në muaj dhe pagat e tjera si ajo e Kryetares së Kuvendit, Presidentit, etj.