Shqipëria renditet e 65-ta për liritë ekonomike

Instituti Kanadez "Fraser" ka realizuar një studim për zhvillimin ekonomik në rajon dhe në botë Shqipëria është renditur e 65-ta në listën e 141 vendeve përsa i përket lirive ekonomike. Ka qenë Instituti Kanadez "Fraser" ai që ka realizuar këtë raport për vendin që i përket vitit 2007.

Në këtë raport janë marrë në studim tregues të ndryshëm, si zbatimi i ligjit dhe të drejtat e pronës, madhësinë e qeverisë, kredinë për ekonominë, punësimin etj.

Në një sërë treguesish vendi renditet në një pozicion të mirë, duke lënë pas një sërë vendesh. Shqipëria renditet në vend të 65 dhe pas saj vjen në renditje Ghana, Armenia dhe Bullgaria. Vendi që renditet i pari në këtë studim në shkallë botërore është Hong Kongu dhe pas tij vjen Singapori.

Ndërsa të fundit në botë përsa i përket lirive ekonomike realizuar nga Instituti Kanadez "Fraser" renditet Zimbabwe. Përmirësimi në renditjen botërore të vendit përsa i përket zhvillimeve ekonomike është bërë i ditur pak ditë më parë edhe nga ana e Bankës Botërore, në raportin e saj për biznesin.

Por biznesi në vend bën të ditur se ende konstatohen probleme të mëdha infrastrukturore ku përfshihen konkurrenca e pandershme, taksat e larta dhe korrupsioni në rritje. Por këto raporte mbeten për t’u interpretuar pasi një tregues që vlerësohet në rritje të fortë, mund të sjellë edhe ndryshimin tërësor të renditjes. Në raportin e fundit të BB vetëm mbrojtja e investitorëve ishte një nga treguesit që kishte ndryshuar tërësisht renditjen e vendit në listën botërore.