Gjirokastër, një muze i ri për grupet turistike në Kalanë e gurtë ($)

Një muze i ri pritet do ti shtohet së shpejti mjediseve të Kalasë së gurtë të Gjirokastrës. Organizata për Ruajtjen dhe Zhvillimin e Gjirokastrës në bashkëpunim me një ekip kërkimor po punon për ngritjen në mjediset e kështjellës të një muzeu të veçantë.

Eksponentët e tij do të përfshijnë jo vetëm elementët historik, etnografik, trashëgiminë kulturore të Gjirokastrës por edhe ato të luginës së Drinos në tërësi. "Muzeu po konceptohet si një përmbledhje materialesh arkivore, fotosh, të dhënësh gojore, etj", thotë përfaqësuesi i Organizatës për Ruajtjen dhe Zhvillimin e Gjirokastrës, Sadi Petrela.

Përmes këtij muze vizitorët vendas dhe të huaj do të marrin një informacion të pasur të historisë së kulturës në qytetin e Gjirokastrës dhe në luginën e Drinos në tërësi.
Iniciatorët e këtij projekti aktualisht po detajojnë dosjen dhe dokumentacionin përkatës ndërkohë që zbatimi i tij pritet ta bëjë kështjellën e gurtë të Gjirokastrës më tërheqëse për grupet e vizitorëve vendas dhe të huaj.