Vlorë, nis aksioni për disiplinimin e vendparkimeve të automjeteve

Policia e qarkullimit rrugor ne qytetin e Vlorës, ka nisur një aksion, që synon disiplinimin e vendparkimeve të automjeteve, auto-veturave taksi dhe disiplinimin e këtij aktiviteti.Burime zyrtare të policisë lokale, bëjnë te ditur se gjatë dy ditëve të fundit, janë aplikuar 350 gjoba, si dhe janë marrë masa të tjera administrative. Po ashtu, janë paralajmëruar për heqjen e lejes së drejtimit mjaft drejtues automjetesh, të cilët janë kapur me shkelje të ndryshme të rregullave të qarkullimit. Aksioni i policisë rrugore nisi në zbatim të një vendimi të këshillit bashkiak ku përcaktohen vendparkimet e automjeteve, si dhe vendqëndrimet e autoveturave, që punojnë taksi. Pak javë më parë, policia e Vlorës bllokoi 60 autovetura të llojeve të ndryshme, të cilat kishin mangësi në dokumentacion.
 Në tre muajt e fundit, policia e Vlorës i ka shtuar aksionet dhe ka forcuar kontrollet, ndaj automjeteve me mangësi në dokumentacion dhe zbatimin e rregullave të qarkullimit.